Presidenti Vladimir Putin ka paralajmëruar përsëri se trupat ukrainase duhet të tërhiqen nga rajoni lindor i Donbasit të Ukrainës ose Rusia do ta pushtojë atë, duke hedhur poshtë çdo kompromis se si t’i jepet fund luftës në Ukrainë.

“Ose i çlirojmë këto territore me forcë, ose trupat ukrainase do të largohen nga këto territore”, tha ai për India Today. Moska kontrollon rreth 85% të Donbasit.

Presidenti ukrainas Volodymyr Zelensky e ka përjashtuar mundësinë e lëshimit të territorit.

Komentet e Putinit vijnë pasi Donald Trump tha se negociatorët e tij që po diskutonin një plan paqeje të SHBA-së besonin se udhëheqësi i Rusisë “do të donte t’i jepte fund luftës” pas bisedimeve të së martës në Moskë.

I dërguari i Trump, Steve Witkoff, i cili ishte në Moskë, do të takohej me ekipin e Ukrainës në Florida.

Trump tha se bisedimet e së martës në Kremlin ishin “mjaftueshëm të mira”, duke shtuar se ishte shumë herët për të thënë se çfarë do të ndodhte pasi “duhen dy persona për të kërcyer tango”.

Kremlini tha të premten se Moska po priste një përgjigje nga Uashingtoni pas takimit në Rusi.

“Tani po presim reagimin e kolegëve tanë amerikanë ndaj diskutimit që patëm të martën”, citohet të ketë thënë ndihmësi i Kremlinit, Yuri Ushakov, sipas RIA-s.

Ai shtoi se nuk kishte plane për një telefonatë midis Putinit dhe Trumpit, dhe nuk ishte caktuar asnjë datë për një takim të ri me Witkoffin.